Smidse

Elk dörp har zien eigen wagenmaker en smid. Disse beiden warkten op bestelling en mossen good met mekaar kunnen samenwerken. De wagenmaker maakte de wielen en de smid smeedde de iezeren hoepels dee um de wielen hen kwamen. De wielen wörden met 'n pal op de as vastzet. Disse pal, dee tijdens 't rijden onder grote druk steet, voorkomt dat 't wiel van de as of schöt. Doar kump ok de oetdrukking 'pal stoan' vandaan: onwrikbaar of onverzettelijk wezen. Iezer hef de vervelende eigenschap dat 't krimpt as 't ofkuult. De smid mos dus 'n echte vakman wezen um de hoepels precies passend te maken. As ze te klein warren, kwam ie mooi te pas... Iezer mut smeed worden as 't heet is. En um deur te kunnen warken, mos ie meerdere iezers in 't vuur hebben. De schure is 'n deurritschure. An de ene kaante kon de wagen noar binnen rijden en an de aandere kaante kon he-j d'r weer oetrijden, zonder dat de wagen dreaid hoefde te worden.

Dokken maken

Recht onder de pannen en op de panlatten wörden bundels stro anebracht. Disse bundels neumden ze dokken. 't Stro was 't restant van de rogge. De volle lengte van 't stro wörd één keer dubbel sleugen en met 'n paar strengen vastebonden. Dat was precies wark. As dat nich good gebeurde, leup bi-j 'n flinke regenbui 't water noar binnen. En dan mos ie dokken...

Göbel

Veul machines warren anesleuten op 'n göbel. An disse rosmölle leup 'n peerd in 't ronde en dat zorgde veur de aandrieving. Veur 'n peerd was dat zwaar en saai wark. D'r mos voortdurend met gelieke kracht en in 'tzelfde tempo warkt worden. Doarum har 't peerd vaake oogkleppen op. Leup 't peerd te langzaam, dan kon 't lange haver kriegen: zweepslagen. Sommige boeren gungen nich al te zuunig met heur peerd um. Zoas 't Twentse gezegde zegt: 'Ik bin lééver zien biebel as zien peerd.' Ik bin lééver zien biebel, want doar kan he-j nich op sloan.