Möllenhoeske en papeermölle

't Enige gebouw in 't park dat de status van rieksmonument hef, is 't möllenhoeske. 't Möllenhoes stamt oet 1450. 't Woonhoes is in 1810 deur den drost verkocht en kwam in 1960 in bezit van de gemeente. Tot 1860 zat d'r an dit möllenhoes nog 'n watermölle vaste, dee met 't rad in de möllenbeke dreaide. 't Was 'n koarnmölle. De mölle wörd veud deur 'n grote möllenkolk en was 'n bovenslagmölle. Dat betekent dat 't water van boven op 't möllenrad völ. De mölle stun bekend as de vuurste mölle. De achterste mölle lag in de buurt van de vievers an de achterkant van 't Commanderieplein. Beide möllens heurden bi-j 't kasteelkoppel dat zich op disse plaatse bevond. 't Möllenhoeske is 't enige gebouw dat van dit landgoed oaverbleven is. Beide möllens warren dwangmöllens. Pachters van 't kasteel mossen heur rogge bi-j disse möllens loaten malen. Doarveur mossen zee vanzelf meer betalen as bi-j de vri-je mölle in de stad. Den boer dee 's mörgens 't eerste bi-j de mölle kwam, was ok 't eerste an de beurt. 'Wie 't eerste kump, dee maalt 't eerste.'