Weemhof
Dit is één van de oldste gebouwen op ’t terrein, ’t veurmoalige restaurant „De Wanne”.
De Weemhof lik ’t niejste gebouw op ’t terrein, mer is in de kern één van de oldste. ’t Gebint, de dragende constructie van hölten balken, stamt oet de veertiende of vieftiende eeuw. Zo’n good gebint wör vrogger vaake meerdere keren hergebruukt. Zo hebt disse gebinten van 1969 tot 1997 deel oetmaakt van ’t exclusieve restaurant De Wanne.
De naam Weemhof is ofleid van weem of wheeme, nen benaming veur ’n pastorie. De betekenis geet terug op ’t oold-Friese wetheme, dat karkelijk bezit betekenden. Völle dörpen en steden hebt wal ’n Weemstroat en ’t woord weem kuj af en too ok terugvinden in achternamen, zoas Oude Nieuwe Weme.
In ’t gebouw zeet ie wisselende tentoonstellingen en kuj ’n korte introductiefilm oaver ’t museum bekieken.
Ok veend ie hier ’t begin van de textielindustrie in Twente. Dee textielindustrie gaf in de veurige eeuw wark an völle doezenden leu in de vele fabrieken dee hier waren. Disse industrie begun al in de achttiende eeuw op de boerderieje. Veural in de wintertied sponnen boer en boerin, vaake van ’t zölf verbouwde vlas, garen op ’n spinnewiel en weefden dat op ’n weefgetouw tot linnen stof.
’t Grote mozaïek kump van de Twentse Textielschool in Enschede, woar ’t in 1952 in ’t schoolgebouw anebracht wör. In 2017 verhuisden ’t kunstwark van Nel Klaassen noar disse plek.
An ’t historische weefgetouw kuj zeen hoeveel wark ’t was um stof te weven. Weet ie woar ’t spreekwoord „op z’n elf en dertigst” vandaankump? Op zo’n weefgetouw zit ’n ‘boom’ woar ’t garen op spannen wör in dartig groepen van elk honderd dröaden. Deur disse dröaden, de schering, steeds um en um omhoog en omlaag te loaten goan en d’r ’n spoel met ’n droad, de inslag, deurhen te loaten scheeten, ontstun de linnen stof.
Wol ie ’n heel sterke stof maken, dan voegen ie d’r elf groepen van honderd dröaden an too. Dat was völle wark en doar duurden ’t weven völle, heel völle langer. Alles wat langzaam en heel secuur gung, gung dus „op z’n elf en dertigst”.
As d’r wat te vieren was, bieveurbeeld as nen boer wat jongs har, ’n jong kalf of ’n veulen, dan schonk e ’n borrel van rozienen op brandewien: boerenjongens. De naam hef niks met jongens te maken. Boerenmeisjes, abrikozen op brandewien, is ’n verzinsel van latere datum.
As de kastelein oe vrogger vertrouwde, kreeg ie misschien krediet. Dan mochten ie de boerenjongens opdrinken en later betalen. Hee zetten oe schuld op ’n stok deur d’r met ’n mes inkepingen in te maken. Zo’n stok heet ’n kerfstok. ’t Spreekwoord „wat op de kerfstok hebben” is doarum ok nich bepaald positief.
